Irene Waage tilbake i Mostraspelet!

Det er gledeleg for oss at Irene Waage endeleg skal vera med i Mostraspelet I slik ei natt, i rolla som Ragnhild.
  • Eg er svært glad for å vera med i Mostraspelet igjen. Det er no ti år sidan eg var med i Kristkongane på Moster. Det er godt å kunne komma heim til Bømlo og jobba innimellom. Gler meg til å treffa gamle og nye Mostraspelarar og ikkje minst ha Nina Sele som regissør, seier ho.
Irene er frå Bømlo og er utdanna ved Statens Teaterhøgskule (KHIO). Ho har mange år bak seg ved Den Nationale Scene, Hordaland Teater ( Det vestnorske teateret) og Sogn og Fjordane Teater (Teater Vestland), og vore med i framsyningar som mellom anna Vildanden, Kristin Lavransdatter, Hellemyrsfolket, Fanny og Alexander, Les Misérables, Kirsebærhaven og Namnet. Med Irene får me ein erfaren, stødig og meget talentfull skodespelar inn i ensemblet. Me ynskjer ho hjarteleg velkommen heim til Bømlo Teater og til Mostraspelet - I slik ei natt. Framsyninga går 18.-20. juni i Moster Amfi.

Nina Sele – årets regissør for Mostraspelet – I slik ei natt

Det er ei stor glede for oss å presentere Nina Sele som regissør for Mostraspelet - I slik ei natt. Nina har vore ein del av den kunstnarlege leiinga sidan urpremieren i 2016 både som regiassistent og som med-regissør, i tillegg til å vera skodespelar i framsyninga. Ho var også med i mange år i Kristkongane på Moster, både som amatør og profesjonell skodespelar.

  • Fyrst og fremst takkar eg for tillita. Sidan eg har vore med frå starten av I slik ei natt, så meiner eg å ha god kjennskap til spelet. Det å no stå i spissen for det kunstnarlege arbeidet ser eg på som ei stor gåve, seier Nina Sele.
  • Gjennom eit godt samarbeid med Bømlo Teater og alle dei fantastiske folka som er involvert i spelet på alle plan, er dette ein vår eg ser fram i mot. Arbeidet med spel som kombinerar amatører og profesjonelle har ein eigen dynamikk som det er utruleg kjekt å jobba med. Kanskje ikkje så rart dette ligg mitt hjarte nært, eg vaks jo opp i Mostraspelet.
Med å ha Nina med på laget får me ein god og tydeleg leiar med stor kompetanse. Ho kjenner Bømlo Teater godt, har ei høg stjerne blant våre skodespelarar, og i teateret generelt.
  • Det er naturleg og rett at det er Nina som tek over no, seier dramatikar og tidligare regissør for framsyninga Svein Tindberg.
  • Ikkje berre har ho vore ein dyktig skodespelar gjennom mange år, men hennar skarpe auge for regi har vore åpenbart for alle oss som har jobba med ho. Kunstnarleg teft, humor og eit varmt hjarte, - kan det bli betre, fortsett han. Svein og Nina har jobba tett saman med I slik ei natt sidan 2016.
Nina Sele er frå Bømlo og har vore med i ei rekke produksjonar med Bømlo Teater både som skodespelar og regissør. Ho er utdanna skodespelar ved NISS, og har jobba ved mellom anna Haugesund Teater og Jo Strømgren Kompani. Nina er ei av kreftene bak teaterkompaniet Scenekraft. Her har ho gjort sterke roller i mellom anna Sviker, Rederinnene og i Heddanominerte Rabinowitz.
  • Framsyningar i Moster Amfi 18.-20. juni 2020.
  • Billettar på bomlo.net
 

Audition for Mostaspelet – I slik ei natt 2020

          Bømlo Teater skal halde audition til Mostraspelet – I slik ei natt, for rollane Gyril, Tord og Omar. Me søkjer etter tre unge amatørskodespelarar i alderen 16-23 år til desse rollene. Framsyningar i Moster Amfi 18.-20. juni. Øvingar vil i hovudsak bli torsdagar og helger frå mars/april.
  • Dato for audition: Laurdag 01.02.2020
  • Stad: Bømlo Teater sine lokalar i Urangsvåg, Bømlo.
  • Påmelding gjerast til post@bomloteater.no innan 20.01.2020.
  • Tekster til førebuing blir sendt ut ved påmelding.
  • Les meir om rollene her
Det er allereie mange dyktige unge skodespelarar som er knytta til teateret , men me vil også invitera andre som ikkje har vore med oss før. Me veit det er mykje talent der ute, så me håper at det er mange som melder seg på. Dette er eit godt høve for unge skodespelarar til å få spanande utfordringar i eit trygt og godt miljø. Mange syns nok at det å gå på audition kan virke skummelt, men me lover å leggje til rette for at opplevinga skal bli god og at ein føler seg godt ivaretatt.

Gi ei kulturoppleving i julegåve

Opplevingar, bøker og tid i felleskap seglar opp som julegåvetrenden 2019. Kanskje er det akkurat ei fellessoppleving med nokon du er glad i du skal satse på i år? Svein Tindberg si «I slik ei natt» er historia om kong Haraldson og korleis både han og vårt Moster fekk ei ei viktig rolle i både norsk religions- og rettshistorie. Har du ikkje fått sett denne framsyingan? Då har du høve til å skaffe deg gode billettar til halv pris før 31.12 på bomlo.netMerk: Framsyningane er 18.-20. juni 2020.
Boka "Teatereventyret på Bømlo" er å få kjøpt hos Vikse Libris på HSD senteret på Bømlo, no på tilbod til kr 199,-. Bli betre kjent med den over 45 år lange historia til
Bømlo Teater, i både tekst og bilde. Boka er skrive av Kristine Sele, saman med Finn Bakke som har satt saman eit flott utvalg av bilder frå vår historie.